Proxectas

O Plan Proxecta é unha iniciativa da Consellería de Cultura, Educación e Ordenación Universitaria, en colaboración con diferentes organismos, dirixida a fomentar a innovación educativa nos centros a través de programas educativos que desenvolvan as competencias clave como eixe do currículo e os elementos transversais, nos cales se inclúe a educación en valores. Estes son os catro Proxectas do IES Frei Martín Sarmiento: TIConsumes, O Tempo desde o Sarmiento, Fotografía en Curso e Proxecta de Ríos.

Fotografía en Curso é un proxecto incluído nos Plans Proxecta, no que estamos a traballar desde os Departamentos de Debuxo, Inglés e Xeografía e Historia, e no que participan centros de diversas zonas de Galicia, Cataluña, Madrid, Arxentina e Chile.

O proxecto baséase na utilización da fotografía como vehículo de coñecemento da realidade máis próxima. A través do visionado de fotografías de artistas profesionais e da experiencia da toma de fotografías dos propios alumnos e alumnas, buscamos a reflexión crítica sobre a contorna, afondando en valores de moi diversa índole: artísticos, sociais, culturais… intentando incrementar a sensibilidade e creatividade do noso alumnado.

O traballo realízase a través de propostas fotográficas concretas, planificadas e estudadas en profundidade a través da análise de fotografías na aula. Algúns dos temas tratados son os seguintes: Espazos baleiros, Retratos aos maiores, Fotografías desde a xanela, etc.